(1900-1930¿) Romance

link

Nosotros los que garramos
del llabiegu la rabera,
que somos los llabradores
que trabayamos la tierra,
pa mantener tantu vagu
que nos come la redeña.
Somos los más despreciaos
y servimos de comedia,
de aquellos que apenes saben,
más que regolver la llengua,
y acostumbren a lleer,
un periódicu cualquiera,
fain guasa de nosotros,
y tienen razón entera,
que no sabemos falar,
y la razón se nos niega,
non aprendemos otra cosa,
qué vamos facer, "paciencia"
Que non nos lleva más xera,
que los llunes preguntar,
que como taba la feria
si valíen bien los mamones,
si había tratantes de fuera,
que non sabemos uninos,
que si el llabrador fixera
una verdadera unión,
entonces sí que se viera
una verdadera masa,
una poderosa fuelga,
y non queremos chotaos
de sabandixu cualquiera,
que la verdera unión,
ye la madre de la fuerza.
Entós sí que los renteros
habín agachar la cresta
si fixéramos la unión,
que yo no la veo muy cerca
no nos cuspen en fociu
nin servimos de muefla.
Polliticus non lo somos,
porque non sabemos lletra,
non falamos otra cosa
ena fragua na estaferia,
los domingos en cabildu,
si parió la to noviella,
si ta preñada la roxia,
que sé que fuste vendella
y qué tal taba el mercáu,
¿cuánto tedaben por ella?
¿cómo valín los mamones?
Si salín muchos pa fuera,
y a ninguno sey ocurre
preguntar, nin y lleva xera,
quien son nuestros gobernantes,
nin qué partíu nos gobierna,
Oyi decir que el gobiernu
cualquier gobiernu sea,
que ye el padre del pueblu,
si tantos fiyos tubiera,
había tratanos a todos
de una misma manera.

II
Al ministru de fomentu
como yo lo conociera
si llegara por mio casa
(que no creo tal suceda)
habia de aconseyay
el caso que me entendiera,
porque yo del castellanu,
non se palabra siquiera.
Empezaba por brindallu,
siéntese enesa tayuela,
si tien gana de comer,
hay boroña na masera,
hay un tarreñu de llechi,
de la noviella tenrera,
descuidáronse en cimalla,
non pasó a la deburiega,
y lla lleche ensin cimar,
puede comello cualquiera.
Aquí pan non lo comemos,
nin una migaya siquiera,
non siendo pa un enfermu,
o pa distinguir la fiesta,
y si non gastamos mas,
non ye porque non nos sepia.
El pan ye pa los señores,
güevos, carnes y mantega,
nosotros gracies a Dios,
que llenamos la escudiella,
con unes poques berces,
col golor de la morciella,
y dicieron guapamente,
aunque ta la panza llena
maldita falta purgantes,
nos fain de saldiguera.
¿Entendióme?, ya lo sabe
como vivimos n'aldea.
Ahora voy a entrugay,
escúcheme si quixera.
Ye vusté el encargáu
de toda la España entera,
pa fer que abunde el ganao
como toda la reciella,
los arbolinos frutales
como toda la cebera,
pa que tengamos sobrantes
y chalos pa la Inglaterra,
como ellos nos manden carbón
como si falta fixera.
Dos tercios ha folgando
del suelo de nuestra Iberia,
y tanta xente folgando
en sin tener una cena,
corriendo de riba abaxo
llenos de fame y miseria
sin aque ganar la vida,
fuelga la xente y la tierra,
puede Vusté guapamente
arreglallo si quisiera,
si quier tomar mio conseyu,
voy daillu de carrera.
Oyi, vuelvo repetir,
que el suelu de nuestra tierra
taben dos tercios folgando,
¿y esa tierra por que fuelga?
¿porque no hay quien la trabaye?
o que non paga la xera
o porque los propietarios
no quieren quedar sin nella,
pos entós que la trabaye
con sos brazos el que quiera,
y si non que la reparta,
ente la xente que fuelga
y facellos propietarios,
aunque paguen tan siquiera,
por ser dueños de los bienes,
una rentina llixera,
esi ye el modo de fer,
llamar a España moderna.
Nuestro rey Carlos tercero,
(que Dios en la gloria tenga)
pa roturar posisiones
trixo xente de otra tierra.
España tenía poca
xente con que revolvella,
y mandaron lo más malo,
yera xente de tabierna,
folganzanes y borrachos,
non darán más que miseria,
¿quedaríen escarmentaos
de la xente forastera?
Por supuesto, ya se sabe
pa colonizar la tierra,
a los que non tienen nada,
hay que dayos sementera,
ya se sabe que contraen,
con el Esato una deuda,
y que tienen que pagalla,
a plazos, según se pueda.
Hay que feyos una casa
pa cada uno, siquiera
hay que comprayos ganao,
toda clase de preseos,
tambien hay que mantenelos
mientras viene la collecha
Los Bancos tienen abondo
y un bancu nun ye tayuela,
el gobiernu, fianza firme,
responsable cuando quiera.
Todo padre ta obligáu
atender la so reciella,
primero son los sos fíos,
que de madre forastera,
¡non sé si me entenderá!
quixera que me entendiera,
que todo quedaba en casa
sin salir nada pa fuera,
y el que tien almacenao
dispón dello cuando quiera.
Muncho más fácil y fora
si el gobiernín quixera,
asegurar al colonu
que non fora xuguetera,
del renteru, que nuy basta,
que y paguemos la renta,
aumentando cuando quier,
el cuarenta o el cincuenta,
y tampoco no nos dexen
disponer de la madera,
de un timón pal llabiegu,
o pa fer una portiella,
y non val que nos quexemos
que la casa ye muy vieya,
que les paredes tan podres,
y ta podre la madera
amenazando cayese,
y matanos cuando quiera.
Y nos contesten muy frescos,
devolviendo la respuesta,
si la quiere fabricar
hagala Vd. por su cuenta.
Y gobernamos la panera,
vienen los amos a vello
y nos aumenten la renta,
nos te aumento po la casa,
por los praos y po la tierra...
po lo que yera un xaral
de rebolles y maleza,
hoy paez bien, ta de prao
con abonos ya de yerba.
Con catorce pesiquinos
mio suegra facía la cuenta
de la renta que pagaba
y yo ya pago cuarenta.
Ay Señor que ye mui caro
-si no lo quieres contesta,
a otro le convendrá-
Anda, cogete la puerta.
Al ministru de fomentu
y al primu de D. Ribera
como ye el primer mandón,
puede facer lo que quiera,
había day estes quexes,
más sé que pierdo la xera.
Los mandones y Renteros
por amistá o parentela
defiendin unos por otros
y el llabrador siquiera
nadie defiende por él
aunque de fame se muera.